পখিলা/ কোন দেশৰ প্ৰাণী তুমি

কবিঃ- চন্দ্ৰকুমাৰ আগৰৱালা

ফুটুকীয়া সাজ তোমাৰ

হেঙুলীয়া ৰেখা;

কেতেকী ৰেণুৰে ঘঁহা

নাচনী পখিলা।

আগলি পাতত বহি তুমি

ৰ'দ-কাচলি লোৱা

ফুলৰ পাহিত আসন পাতি

ফুলৰ মৌ খোৱা।

মলয়াৰ ছাটি নাচি আহে গা

খৰ বাগৰ মাৰি,

তাতে তুমি উটি যোৱা

পুলুকাটি মাৰি।

মেঘলৈকো যোৱা দেখোঁ

স্বৰ্গৰ কথা কোৱা

দেৱকণ্যাৰ খোপাত তুমি

অলঙ্কাৰ হোৱা।

ৰ'দে ছায়ে মিলি তোমাক

ধুনীয়াটি কৰে

কুঁহিলা যেন গাটি তোমাৰ

কেনে বৰণ ধৰে।

শূন্যৰ কোলাত গা ঘেলাই

পানীত মুখ চোৱা,

পদুম ফুলৰ চকাত পৰি

তাতে মোহ যোৱা।

বনৰ মাজত পাতৰ আঁৰত

ক'ত তোমাৰ ঘৰ

কোন দেশৰ প্ৰাণী তুমি

কলৈ মাৰা লৰ?