এইতো নহয়

কবিঃ- অম্বিকাগিৰি ৰায়চৌধূৰী

এইটো নহয় হাঁহি-তামাচাৰ ভাগৰ জুৰোৱা গান-
ইযে জীৱন মৰণ একাকাৰ কৰা অগ্নিবীণাৰ তান ।
       ইযে শত অপমান লাঞ্ছনা হানি উজৰা অসীম তাপ ;
       ইযে ৰূদ্ধ আত্মশকতি নিজৰি ওলোৱা অনল ভাঁপ ।
      ইযে সুধাৰ কাৰণে দেৱ-দানৱৰ সিন্ধু-মথন-গান ;
      ইযে মৃত্যুঞ্জয় পদৰ কাৰণে মহা হলাহল পান
ইযে মাতৃ চৰণ পূজাৰ কাৰণে মুক্ত উদাৰ দান ;
ই যে ভাই ভাই সবে একেটি কথাতে এক হৈ যোৱা প্ৰাণ ।


ই যে হীনতা-নীচতা ভীৰুতা-দীনতা জোকাৰি পেলোৱা ভাব ;
ই  যে এক ৰূপ-ৰসে, এক ৰঙে চঙে এক কৰি দিয়া চাব ।
    ই যে মহা মানৱতা মূৰ্ছিত হোৱা অতি ঘোৰ অপমান ;
    ই যে উৎপীড়নৰ ঘৃণিত গৰ্ব গুৰি কৰা অভিমান ।
    ই যে সুপ্ত জীৱন চকোৱা জগোৱা গুৰ গম্ভীৰ তান ।
    ই যে মানৱৰ অধিকাৰ হেতু কৰা শৃঙ্খল অভিযান  ।
ই যে নৰনাৰায়ন লাঞ্ছিত হোৱা ভয়াবহ ইতিহাস ;
ই যে জীৱনৰ হকে মৰিবৰ হেতু প্ৰাণভৰা অভিলাষ । 

ই যে মুক্ত জীৱ বন্ধন কৰা কঠোৰ বেথাৰ হান ;
ই যে মানুহৰ অবমাননাকাৰীক মৰ্দিত কৰা ধ্যান ।
    ই যে শত আঘাতৰ ৰক্ত ধুউৱা শ্ৰাৱণৰ মহা বান ।
    ই যে মাতৃ আদেশৰ, সন্তান -প্ৰাণ দিবলকে বলিদান ।