Friday, 26 December 2014

মাধুৰী

কবিঃ- চন্দ্ৰ কুমাৰ আগৰৱালা

ফুটোঁ নে নুফুটোঁকৈ
    কুমলীয়া কলিটি,
ওঁঠৰ লাজেৰে ৰৈ
    মিচিকিয়া হাঁহিটি  ।
সামৰি, পাহৰি গৈ
    মেলি আধা প্ৰাণটি,
উদঙাই ঢাকি থৈ
    উঠি অহা বুকুটি ।


সোলকাই মোকলাই
    আধাবন্ধা খোপাটি ,
হয় নে নহয় কৈ
    আধাফুটা মাতটি
শুনো নে নুশুনো ঐ
    উটি অহা গীতটি ,
ৰিণিকি ৰিণিকি কৈ
    কৰবাৰ বাঁহীটি ।

উচুপি নিচুপি গৈ
    খন্তেকীয়া ঠেঁহটি ।
লুকুৱা-ভুমুকা কৈ
    ছয়া-ময়া পেছটি ।
হাঁহোৱেই নে কান্দোকৈ
    ছলছলীয়া চকুটি,
ধেমালি -খঙৰ নৈ
    মিঠা গাঁঠি খোপাটি  ।

ওলাওঁ নোলাও কৈ
    মনোমোহা ঠগটি
ন যযৌ ন তস্থৌ
    অগাপিচা ভৰিটি,
সান্-মিহলিৰ নৈ
    ওভটনি সোঁতটি ;
সাঁথৰ ভাঙনি হৈ
    পানী-মিঠৈ গোটটি
চাওঁ নে নেচাওঁ কৈ
    মৰমৰ দেহিটি
দেৱী নে মানৱী ঐ
    মাধুৰীৰ ছবিটি ।

No comments:

Post a Comment