কবিঃ- সিংহদত্ত দেৱ অধিকাৰী
শুভ সম্ভাষণ মোৰ নৱ জলধৰ !
প্রিয়া-বিৰহ-কাতৰ কুবেৰানুচৰ
যক্ষ মই। হায়, কিনো, দুঃসহ
বেদনা !
বন্ধু তুমি সাধু তুমি তোমাৰ কৰুণা
মাগো আজি সকাতৰে । বিৰহিণী প্রিয়া
মোৰ আছে অলকাত যদি আনি দিয়া
কুশল-বাৰতা ! হায় প্রিয়া-অশ্ৰুজল
পূৰ্ণ কৰি অলকাৰ মণি-হৰ্ম্যতল ৷
কৃষ্ণপক্ষ জোনদৰে প্রিয় কিবা মোৰ
আহিব লাগিছে ক্ৰমে ! ই বিৰহ ঘোৰ
কি ৰূপে পৰি ছায়। খন্তেক আঁতৰে
ভূ-লুণ্ঠিতা প্রিয় মোৰ বিৰহ কাতৰে ;
সুদীর্ঘ বৰষ এক হই অদর্শন
কি মতে সহিব হায়! তুমি মহাজন
পৰহিত-ব্ৰতধাৰী, তব অনুগ্রহ
শান্তি-পানী ঢাল, হায় যাতনা দুঃসহ।
No comments:
Post a Comment